قصيدة على لسان كلب (إبن ذوات)
هَوْ هَوْ هَوْ هَوْ
هَوْ هَوْ هَوْ هَوْ
أنا كلب حليوة ...
وواكل الجو
أنا أصلي رقيق ..
حبوب ووفائي
لكل صديق!
صحتي كدة بـُمْبْ ومتعافي.
وبروح النادي وبتفسَّح
وكمان كوكي بارك وبتمرجَح
ف رقبتي بطاقتي الشخصية
فيها صورتي ورسمي وأوصافي
وكمان مدَّلع ومشخْلع.
وبنام في سرير..
ناعم وحرير .
.ولا فهشي شْخـِير
وبقوم م النوم ..
أشربلي عصير
وباخد حمام وكمان دافي
شامبو وسشوار ..
وكريم وعطور
وإيدين بتاخدني على البشكير
أصل أنا ديليكا ...
مدمن شوكولا ..
ولا أقولشي الآه
وبروح للدكتورم العطسة
وكمان فافي
واللحمة باكلها مدى الأسبوع
وانا مالي الناس ما تقع م الجوع
والشعب مالاقي ولا العضمة
وأنا حبة وحفطس م التخمة.
راكب العربية آخر موضة
وماليش في الهيصة ولا الزحمة
والناس من قـِلـِّة أهي فاطسة.
أنا دبت خلاص من حسد الناس
الوحشة الكُخة عيون السَّوْ
هَوْ هَوْ هَوْ هَوْ
هَوْ هَوْ هَوْ هَوْ
بلحس (بنبون)
ولابس بيبيون ..
وبحلى بفاكهة كمان وجاتوه
في الصيف بلبس للبحر مايوه.
في البرد كاجيت صوف أصلي أصيل
وعليَّا بذوق أوي متفصَّل
دانا إبن حسب ونسب و أصول
ولا باكل مـِش وطعمية ولا باضرب فول.
وتاريخ العيلة دا متأصَّل
Beagle (بيجل )
(Terrier) تيريير
داتشوند Dachshund
كمان وكمان أفغان Afghan
وكمان ( لولو)*
ما أنا عايش حلو ومتسلطن
والناس ما تقول إللي تقولوا
صلوا على النبي لو جبتم سيرتي
أحسن بسببكم أموت مخنوق
وأروح في الباباي بزغـُطَّة.
دا أنا كدة أحسن من .(ميت 100) قطة
حتى ولو رقصت م الفرحة
على أحلى أغاني البسبس نو
هَوْ هَوْ هَوْ هَوْ
هَوْ هَوْ هَوْ هَوْ
*أنواع من الكلاب أولاد الكلب الأصيلة.
وإلى اللقاء مع قصيدة الكلب ابن كلب اللي من الحرافيش.
الإثنين يونيو 04, 2007 11:04 am